ស្រុកព្រៃនប់៖ មានសេចក្តីរាយការណ៍មកថា វេលាម៉ោង ០៩:៥០នាទីព្រឹក ថ្ងៃទី១៣ ខែវិច្ឆិកា ឆ្នាំ២០២១នេះ មានករណីទូកនេសាទ ០១គ្រឿង ប្រភេទទូកអូស បានលិច ហើយត្រូវបានជួយ ដោយអ្នកនេសាទដូចគ្នាជួយសង្រ្គោះបានចំនួន០២នាក់ និង ០១នាក់ទៀតកំពុងបាត់ខ្លួន។
យោងតាមរបាយការណ៍ពីសមត្ថកិច្ចបានបញ្ជាក់ថា ជនរងគ្រោះទាំង០២នាក់ដែលជួយសង្រ្គោះបានទី១-ឈ្មោះ លយ សុខជា ភេទប្រុស អាយុ២៥ឆ្នាំ មានទីលំនៅភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត និងទី២-ឈ្មោះ គង់ សុភេ ភេទប្រុស អាយុ ២៥ឆ្នាំ មានទីលំនៅ សង្កាត់១ ក្រុងព្រះសីហនុ ។
ជនរងគ្រោះម្នាក់ដែល បានបាត់ខ្លួនមាន ឈ្មោះ សុខ គឿ ហៅម៉ាប់ ភេទប្រុស អាយុ ២៧ឆ្នាំ មានទីលំនៅ ខេត្តព្រៃវែង ។
មូលហេតុដែលធ្វេីអោយទូកខាងលេីនោះលិចគឺបណ្តាលមកពីមានខ្យល់ធ្លាក់ខ្លាំង និងទឹកសមុទ្រមានរលកធំៗបណ្តាលអោយបោកពន្លិចទូក។
សម្ភារដែលបាត់បង់រួមមាន ទូក នេសាទ ប្រភេទបេអឺ ចំនួន០១គ្រឿង ពណ៌ត្រួយចេក មានប្រវែងបណ្តោយ ១០,៥០ម៉ែត្រ ទទឹងប្រវែង០២,៧០ ម៉ែត្រ, ម៉ាស៉ីនម៉ាកHYUNDIA(ម៉ាសុីនឡាន)ចំនួន០១គ្រឿង និងឧបករណ៍ នេសាទមួយចំនួន ។
ករណីលិចទូកខាងលើគឺបានកើតឡើង នៅចំណុចខាងត្បូងឆៀងខាងកើតកោះតាគៀវ ចម្ងាយ០៨ ម៉ៃ ដែលមានយាមការលេខ N១០°២១'៥០" និង E១០៣°៣៧'០០" នៅលើទូកមានមនុស្សចំនួន០៣ នាក់ ហើយត្រូវបានជួយ ដោយអ្នកនេសាទដូចគ្នាជួយសង្រ្គោះបានចំនួន០២ នាក់ និង ០១នាក់ទៀតកំពុងបាត់ខ្លួនបច្ចុប្បន្នកំពុងស្វែងរកអ្នកបាត់ខ្លួន ។
គួរបញ្ជាក់បន្ថែមផងដែរថា មកទល់និងវេលាម៉ោង៦ល្ងាចថ្ងៃទី១៣ ខែវិច្ឆិកា ឆ្នាំ២០២១ដដែរនេះ ការរុករកមនុស្សម្នាក់ទៀតដែលបានបាត់ខ្លួននោះគឺរកពុំទាន់ឃើញនៅឡើយទេ៕
